علامات السواء النفسي عند الأم نشر في صفحة شغبطة

عندنا نوعين من الأمهات، أم سوية وأم غير سوية..

طب ايه أول علامات السواء النفسي لدى الأم؟!!

يوم ماتجي تعاقب أسلوب عقابها عامل ازاي ؟!

لو عقابها للطفل يتمثل في حرمانه من احتياجاته الضرورية من الأكل والشرب أو الحنان فتبقى هنا غير سوية في تربيتها لأنها بتقرن محبتها لابنها بكونه عمل الحاجة اللي عاوزاها أو لا، فبيوصل للطفل رسالة: "طول مانا هادي ومطيع هي بتحبني خلاف كدة هي مش بتحبني"

أما لو عقابها يتمثل في كونها تعلمه وتربيه وتسحب منه حاجة أو تخليه يشارك في حاجة زي مثلا يشارك في الاعمال المنزلية.. تسحب منه تابلت أو لعبة غير ضرورية أو حاجات مش حيوية تماما فكدة بتوصله رسالة إنها زعلانة منه لكنها لسة بتحبه.. لسة بتطبطب عليه.. وبتأكله وبتشربه..محبة غير مشروطة ، لما يكبر الطفل حيفضل حاسس دايما إن وراه سند وظهر يقويه مهما اختلف مع أمه.. وده أكبر إحساس بالأمان.

والإحساس بالأمان ده بيفرق؟

أكيد، حيبقى ناضج عاطفيا للدرجة اللي عارف يجود بعواطفه على غيره وحيعرف يدي في كل مجال في حياته سواء في شغله أو أسرته أو ولاده الحرمان العاطفي بيخلي الإنسان دايما جعان، جعان محبة واحتواء وحنية ممكن جدا يبقى فريسة للاستغلال من قبل الآخرين وقلة تقدير الذات لنفسه لذلك أرجوكي خليكي في ظهر ابنك واسنديه.. مش حقولك انتظري منه رد الجميل لكن حقيقي أعظم إحساس في الكون إحساس الزرعة لما بتطرح ورد وفل وياسمين

ياترى ناوية زرعتك تطلع ايه؟!!