موضوع بيقلق ستات كتير ..هنا في مصر بالتحديد

.هموم كتير وشغل اكتر بيستنى الست المصرية وبيخليها اما في حالة احباط او حالة قلق طول الوقت من اللي وراها....سواء كانت ستات بتشتغل او ربات بيوت..

طيب ازاي تقدري تنظمي وقتك وسط زحمة الدنيا اللي عندك؟

١-حددي اولوياتك ...مهم انك تعرفي ايه الاهم من المهم..وتقدري تميزي بينهم..أستعيني بأچندة ماما في الشغل علشان تقدري تكتبي أولوياتك و تظبطي وقتك

٢- بالنسبة لشغلك لو بتشتغلي....جميل جدا ان تبقي طموحة وذكية..بس لازم توازني.....ومتسرفيش فيه على حساب بيتك...وعلطول طوري من نفسك كل يوم..خصصي لنفسك جدول يومي باللي عاوزة تعمليه..وعلقيه في مكان ظاهر..ولما تنتهي مهمة اشطبي عليها من غير قلق او توتر...

٣- شغل البيت خليه دايما بليل في وقت متأخر او الفجر..بحيث محدش يزعجك وتقدري تشتغلي بهدوء.

٤- حاولي تضغطي الاعمال الكبيرة في وقت صغير في بعض الاحيان.. يعني تخصصي للمطبخ يوم او يومين..والوضع كذلك لاعمال الغسيل والتنظيف...حتبقي ايام صعبة ومرهقة..لكنها حتفرق معاكي في بقية الاسبوع....

٥- بالنسبة للولاد...السنين الاولي من التربية صعبة شوية..خصوصا لو انتي لوحدك...بس بعد كدة لازم تربي فيهم حس أنهم يعتمدوا على نفسهم ومساعدتك حتى ولو في حاجات بسيطة...الامومة المثالية في المقام الاول يعني انك تربي انسان سوي قادر يتحمل مسئولية بيته بعدين ..

٦- بالنسبة لزوجك..مكتسفيش تطلبي منه المساعدة..ده عمره مكان عيب ولا حينقص من رجولته...انتي كمان مش حتتاخري عنه لما يطلب مساعدتك...... اطلبي اللي انتي عاوزاه في حدود امكانياته وقدراته ومش لازم تبقي ام طول الوقت..

٧-اتعودي كل يوم تخلي لنفسك ولو عشر دقايق اقل حاجة تقعدي فيهم مع نفسك.وتعملي حاجة بتحبيها.لمجرد انك ترتاحي..حيخلي عندك طاقة تكملي بعدين..انتي انسانة مش آلة.

٨- متنسيش الجانب الروحي اللي في شخصيتك...حاولي دايما تنميه...حينشر جواكي سلام وطمأنينة ومحبة لكل حاجة بتعمليها..

٩- البيت يعني روح......اهم حاجة بتميزك انك تحافظي على الدفا اللي جواه.. مهمتك الاساسية انك تبقي دايما مصدر حب وبهجة لكل اللي حواليكي...ويقدروا يستشيروكي في اي وقت كصديقة ليهم ...وده ممكن يكون اهم من اي شيئ تاني..

١٠- وأخيرا صدقي الحدس اللي جواكي.لما يقولك انك تقدري تعملي كل حاجة..حتى لو محدش قالك كدة.. فكفاية انك مكملة وصامدة ...

و افتكري المقوله الشهيرة " ليس الحمل هو ما يكسرك ، بل هي الطريقة التي تحمليه بها "