افكار لقضاء الأجازة للأمهات العاملات نشر في صفحة ماما في الشغل

مساء الفل، الاجازة جت..وكتير مننا بيبقي حابب انها تكون اجازة مميزة

...وده عشان تبقي دفعة اننا نكمل بعدين...طب ازاي ده يحصل مع شغلك ومسئولياتك بعدين كست عاملة؟

اولا..بشكل عام

• اعملي برنامج...بعدد ايام الاسبوع...بالحاجات اللي حابة تعمليها في الأجازة...حيوفر عليكي كتير وكل يوم حيعدي حيحسسك بالانجاز..التخطيط السيئ من أهم اسباب اضاعة الوقت..

• حاولي على اد ماتقدري تاخدي ايام اجازة من شغلك...انتي كمان محتاجة تفصلي من جو الشغل وزحمته..وترجعي قادرة تدي ...والايام اللي يبقي عندك فيها شغل...استغلي النص اليوم الموجود...في اي حاجة من اللي حاطها في جدولك..

• الاجازة بيروح منها كتير لما النوم يكون له النصيب الاكبر منها...فبالنسبة للاولاد..لازم يتعودوا يصحوا في مواعيد برضه محددة...مش زي مواعيد المدرسة...لكن متاخر شوية حوالي من ساعة لساعتين...عشان يحسوا بقيمة الوقت

دايما في حياتهم

ثانيا:بشكل خاص

• اهتمي بالجانب الترفيهي ..زي الاماكن المفتوحة من الحاجات الحلوة جدا...سواء نادي..او حدائق. او مدن ملاهي..وخصوصا لو في العاب امنة. وأماكن لركوب العجل ...تقدري تطمني على ولادك فيها...تقدري تستمتعي فيها..وفي نفس الوقت تمتعي ولادك..فكرة المكان المفتوح انه دايما دليل على الحرية...لان البيت بيفضل مكان مقفول حتى لو فيه كل وسائل المتعة وكل الألعاب..وياحبذا لو يتم زيارتها اكتر من مرة...ويبقي يوم من اوله لاخره..وكل احتياجاتك من الاكل والشرب تبقي معاكي...

• عندك جانب مهم جدا لازم تهتمي بيه...جانب الخيال..الخيال عامة متعة جميلة...بيخلي العقل دايما متطور ونشيط.. ...فده من خلال القراءة خلوا بالكم معرض الكتاب هيفتح من يوم ٢٧ يناير ل ١٠ فبراير ...او مسارح..مسارح الاوبرا (اي عرض او حفلة) أو ساقية الصاوي واختياركم للنوع بيبقي على حسب اهتماماتكم بشكل عام

• الجانب الوجداني والتواصلي مع الأقارب مهم جدا والعائلات الصديقة...مش بس لانه صلة رحم..بس بيخلق جو من العشرة والالفة والود...الانسان بطبيعته بيحب المشاركة..

• جانب التأمل .فلو ليكم فيه...ممكن تبقي في رحلات بتطلع تخييم وسفاري ...في كتير من الاماكن في الفيوم (وادي الحيتان – محمية وادي الريان ) ...وفي القاهرة (محمية وادي دجلة )..وفي اماكن تانية ممكن يفيدك انتي شخصيا في انك تقعدي مع نفسك. ..واليوم مش بيبقي مكلف تماما...لكنه عن تجربة بيبقي يوم مميز جدا...الانسان دايما بيحتاج خلوات تفصله عن العالم الخارجي...ويعيش التأمل بكل صوره.. لو سفرية لمدة كام يوم....في الاماكن الدافية زي الاقصر واسوان...وصعيد مصر عامة بيبقي جميل جدا في الشتا...ولو بتحبي تقري..السفريات بتبقي جو مناسب للقراية...اللي من شانها تثقل روحك.. وتنميها..

• من فضلك متننسيش الجانب الروحاني..انكم تعملوا سوا عمل تطوعي مع بعض كأسرة..حيعزز الروابط اللي بينكم كتير...

• متهمليش في نفسك ومتنسيهاش....خصصي يوم يكون بس انك تجددي في شكلك..عشان نفسك .مرواحك للكوافير او الساونة او مساج...مهما كانت تفاهة الحاجات دي من شانها تعزز إحساسك بأهمية نفسك

وفي النهاية

حتقوليلي انه الجو برد..حقولك انه البركة في الحركة....وصدقيني خسارتك بالقعدة في البيت اكبر بكتير من خسارتك بالخروج...أرجو المقترحات ديه تعجبكم و تستفيدوا بيها و ...اتمنالكم اجازة سعيدة مقدما